Efecto invernadoiro

O aumento da temperatura atmosférica débese á concentración de gases como o dióxido de carbono e o metano, que actúan como o cristal dun invernadoiro, permitindo o paso da radiación solar á vez que atrapan parte da calor irradiada pola superficie terrestre. Este é un fenómeno natural, sen o cal a vida na Terra tal e como a coñecemos non sería posible; sen el, a temperatura media da superficie sería de -18 °C. Tras a Revolución Industrial, a queima de combustibles fósiles e as emisións de certas industrias aumentaron a cantidade de gases de efecto invernadoiro, o que incrementou a cantidade de calor retida e provocou un aumento das temperaturas (quecemento global) que está na raíz do cambio climático.